އެންޓި-ކޮރަޕްޝަން ކޮމިޝަން

ހދ.މަކުނުދޫ ކައުންސިލް އިދާރާއިން އެކިފަރާތްތަކަށް ޙަވާލުކުރަންޖެހޭ ފައިސާ އެއިދާރާގެ ކުރީގެ ކައުންސިލަރ އަބްދުﷲ ޙަމީދު ނަގާފައިވާކަން އެނގޭކަމަށާއި، ޢަބްދުﷲ ޙަމީދަކީ ފައިސާ ޚަރަދުކުރުމަށް ހުއްދަދޭ ފަރާތަށްވާއިރު، އެކަމަކީ ދައުލަތުގެ މާލިއްޔަތުގެ ގަވާއިދުގެ ބާބު 4 ގެ 4.01 ވަނަ މާއްދާގެ (ނ) އާއި ޚިލާފަށް ކޮށްފައިވާކަމެއްކަމަށް ބެލެވޭ މައްސަލަ މިކޮމިޝަނުން ތަޙްޤީޤުކޮށް ބެލިބެލުމުގައި،
1- ހދ.މަކުނުދޫ އޮފީހުން އެކިފަރާތްތަކަށް ހަވާލުކުރަންޖެހޭ ފައިސާއާ ހދ.މަކުނުދޫ އޮފީހުގެ ކުރީގެ ކައުންސިލަރ ޢަބްދުﷲ ޙަމީދު ނަގާފައިވަނީ ދައުލަތުގެ މާލިއްޔަތުގެ ޤަވާޢިދުގެ ބާބު 4 ގެ 4.11 ގެ (ނ) އާ ޚިލާފަށްކަމާއި، އެގޮތުން ޢަބްދުﷲ ޙަމީދު ނެގި ފައިސާގެ ތެރެއިން 3 ފަރާތަކަށް ހަވާލުކުރަންޖެހޭ ފައިސާ އެފަރާތްތަކަށް ލިބިފައިނުވާކަމަށާއި، މީގެއިތުރުން ފައިސާ ލިބެންނުޖެހޭ ފަރާތެއްގެނަމުގައި ފައިސާ ނަގައި ޢަބްދުﷲ ޙަމީދު ހަވާލުވެފައިވާކަން ތަޙްޤީޤަށް ފާހަގަކުރެވިފައިވާތީ، މިކަމަކީ މަޤާމުގެ ނުފޫޒު ބޭނުންކޮށްގެން ނާޖާއިޒު ފައިދާއެއްހޯދުމަށް ކޮށްފައިވާ ޢަމަލެއްކަމަށް ވުމާއެކު، ހދ.މަކުނުދޫ/ގުލްބަކާގެ، ޢަބްދުﷲ ޙަމީދުގެ މައްޗަށް، ޤާނޫނު ނަންބަރު 2000/2 (ކޮރަޕްޝަން ހުއްޓުވުމާއި މަނާކުރުމުގެ ޤާނޫނު) ގެ 12 ވަނަ މާއްދާގެ (ހ) ގެދަށުން، މަޤާމުގެ ނުފޫޒު ބޭނުންކޮށްގެން ނާޖާއިޒު ފައިދާއެއް ހޯދައިފައިވާކަމުގެ ދަޢުވާކުރުމަށާއި، ނާޖާއިޒުގޮތުން ހޯދައިފައިވާ ފައިސާ ޢަބްދުﷲ ޙަމީދު އަތުން ހޯދުމުގެމައްސަލަ ޕްރޮސިކިއުޓަރ ޖެނެރަލްގެ އޮފީހަށް ވަނީ ފޮނުވިފައެވެ.

2- އަދި ހދ.މަކުނުދޫ އޮފީހުން އެކިފަރާތްތަކަށް ހަވާލުކުރަންޖެހޭ ފައިސާ، އެފަރާތްތަކުގެ ލިޔުމެއްނެތި، މަކުނުދޫ އޮފީހުގެ ކައުންސިލަރ ޢަބްދުﷲ ޙަމީދާ ޙަވާލުކޮށްފައިވަނީ، މަކުނުދޫ އޮފީހުގެ އެޑްމިނިސްޓްރޭޓިވް އޮފިސަރ ހދ.މަކުނުދޫ /ފެހިވިނަ، އާދަމް މުޙައްމަދު ކަމާއި، މިކަމަކީ، ދައުލަތުގެ މާލިއްޔަތުގެ ޤަވާޢިދުގެ ބާބު 4 ގެ 4.11 ގެ (ހ) އާއި އެމާއްދާގެ (ނ) އާ ޚިލާފަށް އާދަމް މުޙައްމަދު ކޮށްފައިވާކަމެއްކަމާއި، އާދަމް މުޙައްމަދުގެ މިޢަމަލުގެ ސަބަބުން މަކުނުދޫ އޮފީހުގެ ކައުންސިލަރ ޢަބްދުﷲ ޙަމީދަށް ނާޖާއިޒު ފައިދާއެއް ލިބިފައިވާތީ، ހދ.މަކުނުދޫ ކައުންސިލްގެ އިދާރާގެ އެޑްމިނިސްޓްރޭޓިވް އޮފިސަރ މަކުނުދޫ /ފެހިވިނަ، އާދަމް މުޙައްމަދުގެ މައްޗަށް، ޤާނޫނު ނަންބަރު 2000/2 (ކޮރަޕްޝަން ހުއްޓުވުމާއި މަނާކުރުމުގެ ޤާނޫނު) ގެ 12 ވަނަ މާއްދާގެ (ހ) ގެދަށުން، މަޤާމުގެ ނުފޫޒު ބޭނުންކޮށްގެން ނާޖާއިޒު ފައިދާއެއް ހޯދައިދިންކަމުގެ ދަޢުވާކުރުމަށް ޕްރޮސިކިއުޓަރ ޖެނެރަލްގެ އޮފީހަށް ވަނީ ފޮނުވިފައެވެ.