އެންޓި-ކޮރަޕްޝަން ކޮމިޝަން

ޖަޕާނުގެ ޓޯކިޔޯގައި މިއަހަރުގެ އޮކްޓޯބަރ 21 އިން ނޮވެމްބަރ 20 އަށް ބޭއްވުނު ކްރިމިނަލް ޖަސްޓިސް ރެސްޕޮންސް ޓު ކޮރަޕްޝަން ކޯހުގައި އެންޓި-ކޮރަޕްޝަން ކޮމިޝަންގެ ދެމުވައްޒަފަކު ވަނީ ބައިވެރި ކުރެވިފައެވެ. މިކޯހަކީ ކޮރަޕްޝަންގެ މައްސަލަތައް ތަޙްޤީޤު ކުރުމާއި ކޮރަޕްޝަނާ ދެކޮޅަށް ކުރެވޭ މަސައްކަތްތަކަށް އެކި ޤައުމުތަކުގެ ކަމާބެހޭ މުވައްޒަފުންނަށް ބޭނުންވާ ތަމްރީނު ދިނުމަށް ކޮންމެ އަހަރަކު ހިންގޭ ޓްރޭނިންގ ޕްރޮގްރާމެކެވެ. މި ޕްރޮގްރާމުގައި އެންޓި-ކޮރަޕްޝަން ކޮމިޝަންގެ ފަރާތުން މިއަހަރު ބައިވެރިވީ ކޮމިޝަންގެ އިންވެސްޓިގޭޝަން އޮފިސަރ ޒީނިޔާ ޢަބްދުﷲ އާއި އިންވެސްޓިގޭޝަން އޮފިސަރ ފާޠިމަތު ހައިފާ ޢަބްދުލް ޤައްޔާމެވެ. މި ކޯހުގެ ހުރިހާ ޚަރަދެއް ހަމަޖައްސަވައިދެއްވާފައިވަނީ ޖައިކާގެ ފަރާތުންނެވެ.