އެންޓި-ކޮރަޕްޝަން ކޮމިޝަން

2016 ވަނަ އަހަރުގެ ޤައުމީ އެންޓި-ކޮރަޕްޝަން ދުވަސް ފާހަގަކުރުމުގެ ގޮތުން ޓީޗަރުންނަށް އަމާޒުކޮށްގެން ހޭލުންތެރިކުރުވުމުގެ ޕްރޮގްރާމެއް މިއަދު (17 އެޕްރީލް 2016) ފަށައިފިއެވެ. މި ޕްރޮގްރާމަކީ، ޓީޗަރުންގެ ނަޒާހަތްތެރިކަން އިތުރުކުރުމާއި އެކަޑެމިކް އިންޓެގްރިޓީ ޕްރޮމޯޓްކުރުމުގެ ގޮތުން ކުރިއަށްގެންދާ ޕްރޮގްރާމެކެވެ.

ފުވައްމުލަކުގެ 4 ސްކޫލެއް ކަމަށްވާ، މަދަރަސަތުއް ޝައިޙް މުޙައްމަދު ޖަމާލުއްދީން އާއި، ޏ.އަތޮޅު ތަޢުލީމީ މަރުކަޒާއި، ފުވައްމުލަކު ސްކޫލް އަދި ހާފިޒް އަޙްމަދު ސްކޫލުގެ ޓީޗަރުންނަށް މި ޕްރޮގްރާމް އަމާޒުކުރެވިފައިވާއިރު، 1 ދުވަހުގެ މުއްދަތަށް ކުރިއަށްގެންދާ މި ޕްރޮގްރާމްގައި ކޮންމެ ސްކޫލެއްގެ ޓީޗަރުންނަށްވެސް ވަކިވަކިން ސެޝަންތައް ނަގައިދިނުމަށް ވަނީ ހަމަޖެހިފައެވެ.

އެންޓި-ކޮރަޕްޝަނުގެ ކޮމިޝަނުގެ މުވައްޒަފުން ހުށަހަޅައިދޭ މި ސެޝަންތަކުގައި، ނަޒާހަތްތެރިކަމުގެ މުހިންމުކަމާއި، އާންމު ޚިދުމަތުގައި ނަޒާހަތްތެރިކަމުގެ މުހިންމުކަމާއި، އެކަޑެމިކް އިންޓެގްރިޓީގައި ހިމެނޭ މައިގަނޑު އަސާސްތަކާއި، ދަރިވަރުންގެ ކިބައިގާ ނަޒާހަތްތެރިކަން އާލާކުރުވުމާއި، ސްކޫލްތަކުގައި ނަޒާހަތްތެރިކަން އާލާކުރުވުމާ ބެހޭގޮތުން މަޢުލޫމާތު ޙިއްޞާކުރެވޭނެއެވެ.