އެންޓި-ކޮރަޕްޝަން ކޮމިޝަން

ނަޒާހަތްތެރިކަމުގެ ޤައުމީ ވަޢުދުގައި ވޭސްޓް މެނޭޖްމެންޓް ކޯޕަރޭޝަން ލިމިޓެޑްގެ މުވައްޒަފުން 21 ޖުލައި 2016 ގައި ސޮއިކުރައްވައިފިއެވެ. ވަޢުދުގައި ސޮއިކުރުން ބޭއްވުނީ ވޭސްޓް މެނޭޖްމެންޓް ލިމިޓެޑްގެ މުވައްޒަފުންނަށް ހިންގުނު އެންޓި-ކޮރަޕްޝަން ޓްރެއިނިންގ ވޯކްޝޮޕް ނިންމުގެ ރަސްމިއްޔާތުތެރެއިންނެވެ. މިރަސްމިއްޔާޓު ބޭއްވުނީ އެންޓި-ކޮރަޕްޝަން ކޮމިޝަނުގެ ކޮންފަރެންސް ރޫމުގައެވެ. ނަޒާހަތްތެރިކަމުގެ ގަޢުމީ ވަޢުދުގައި އެކޯޕަރޭޝަނުގެ 25 މުވައްޒަފުން ސޮއިކުރެއްވިއެވެ.
މި ރަސްމިއްޔާތުގައި ވޭސްޓް މެނޭޖްމެންޓް ލިމިޓެޑްގެ މެނޭޖިން ޑައިރެކްޓަރ އަލްފާޟިލް އިބްރާހީމް ފުއާދު ވާހަކަފުޅުދެއްކެވިއެވެ. އެމަނިކުފާނުގެ ވާހަކަފުޅުގައި ވޭސްޓް މެނޭޖްމެންޓް ކޯޕަރޭޝަނުގެ އެންމެހާ މުވައްޒަފުން މަސައްކަތްކުރާނީ ނަޒާހަތްތެރިކަން އިސްކޮށް ފަސާދައަށް ނޫނެކޭ ބުނަމުން ކަމުގެ ޔަގީންކަން ދެއްވިއެވެ. ކޮމިޝަނުގެ ފަރާތުން ވާހަކަފުޅު ދައްކަވަމުން ކޮމިޝަނުގެ ނައިބް ރައީސް އަލްއުސްތާޛު މުޢައްވިޒު ރަޝީދު ވަނީ ވޭސްޓް މެނޭޖްމެންޓް ލިމިޓެޑްގެ އިސްވެރިން ނަޒާހަތްތެރިކަން ކުރިއަރުވާ ކޮރަޕްޝަނަ ދެކޮޅަށް މަސައްކުރުމަށް އިސްނެންގެވި ކަމަށްޓަކާ ޝުކުރުއަދާ ކުރެއްވިއެވެ. އަދި މި މަސައްކަތް ނަޒާހަތްތެރިކަމާއެކު ކުރުމަށް އިލްތިމާސް ކުރައްވާފައެވެ.