އެންޓި-ކޮރަޕްޝަން ކޮމިޝަން

އެންޓި-ކޮރަޕްޝަން ކޮމިޝަން (އޭސީސީ) އާއި ރޭޑިއޯ އެޓޯލްއާ ދެމެދު ބިތުފަންގި ރޭޑިއޯ ޕްރޮގްރާމްގެ 4 ވަނަ ސިލްސިލާ ކުރިއަށް ގެންދިޔުމާ ގުޅޭ ފަހުމްނާމާއެއްގައި 15 މާރިޗު 2017 ގައި ސޮއިކޮށްފިއެވެ.

ފަހުމްނާމާގައި ސޮއިކުރުމަށް އޭސީސީގައި ބޭއްވުނު ރަސްމިއްޔާތުގައި އެންޓި-ކޮރަޕްޝަން ކޮމިޝަނުގެ ފަރާތުން ފަހުމްނާމާގައި ސޮއިކުރެއްވީ ކޮމިޝަނުގެ ރައީސް އަލްފާޟިލް ޙަސަން ލުޠުފީއެވެ. ރޭޑިއޯ އެޓޯލްގެ ފަރާތުން ސޮއިކުރެއްވީ ސްޓޭޝަން އިންޗާޖް އަލްފާޟިލް އަޙްމަދު ޝިޔާޒުއެވެ.

މި ފަހުމްނާމާގެ މަޤްޞަދަކީ ކޮރަޕްޝަނާދެކޮޅަށް ޢާއްމުން ހޭލުންތެރިކުރުމަށް އޭސީސީއިން ކުރާ މަސައްކަތުގެ ތެރެއިން އުފައްދާ ބިތުފަންގި ރޭޑިއޯ ސިލްސިލާ 4ގެ ޕްރޮގްރާމްތައް ރޭޑިއޯ އެޓޯލްއާއި ގުޅިގެން ތައްޔާރުކުރުމާއި ބްރޯޑްކާސްޓް ކުރުމެވެ. 1 ގަޑިއިރުގެ 13 ޕްރޮގްރާމް ގެނެސްދިނުމަށް ހަމަޖެހިފައިވާ މި ސިލްސިލާގެ ހުރިހާ ޓެކްނިކަލް މަސައްކަތެއް ކޮށްދޭނީ ރޭޑިއޯ އެޓޯލްއިންނެވެ.

ރަސްމިއްޔާތުގައި ވާހަކަދައްކަވަމުން ކޮމިޝަނުގެ ރައީސް އަލްފާޟިލް ޙަސަން ލުޠުފީ ވަނީ މިޕްރޮގްރާމް ބްރޯޑްކާސްޓް ކޮށްދެއްވުމާއި ޕްރޮޑަކްޝަން މަސައްކަތް ހިލޭކޮށްދެއްވާ ކަމަށްޓަކައި ރޭޑިއޯ އެޓޯލްއަށް ވަރަށް ބޮޑަށް ޝުކުރު އަދާކުރަށްވާފައެވެ.

ރޭޑިއޯ އެޓޯލްގެ ފަރާތުން ވާހަކަފުޅުދައްކަވަމުން ސްޓޭޝަން އިންޗާޖް އަލްފާޟިލް އަޙްމަދު ޝިޔާޒު ވިދާޅުވީ މުޖުތަމަޢަށް ފައިދާހުރި މިފަދަ މަސައްކަތެއް ކުރުމުގެ ފުރުޞަތު ލިބުނީތީ އުފާކުރާކަމަށާއި ފަހުމްނާމާގައި ނުހިމެނުނުކަމުގައިވިޔަސް އޭސީސީއާއި ގުޅިގެން ކޮރަޕްޝަނާއި ދެކޮޅަށް ހޭލުންތެރިކުރުމަށް އޯޑިއޯ ސްޕޮޓް އުފައްދާ ބްރޯޑްކާސްޓް ކުރުމުގެ މަސައްކަތް ކުރައްވާނެ ކަމަށެވެ.